ब्रेकिंग

क्रीडा

दक्षिण आफ्रिकेने जिंकला विश्वचषक

Wrutuja pandharpure
15 Jun 2025

मार्करामचे झुंझार शतक

लंडन : दक्षिण आफ्रिका संघाने ऑस्ट्रेलियाला नमवत शनिवारी ऐतिहासिक विजयाला गवसणी घातली. टेंबा बावूमाच्या नेतृत्वाखाली जे गेल्या २७ वर्षांत कोणालाच जमले नव्हते. जागतिक अजिंक्यपद कसोटी स्पर्धेच्या अंतिम सामन्यात दक्षिण आफ्रिकेने बलाढ्य ऑस्ट्रेलियाला ५ फलंदाज राखून पराभूत करत जागतिक अजिंक्यपद कसोटी स्पर्धेची मानाची गदा पटकावली. या सामन्यात आफ्रिकेचा सलामीवीर मार्कराम याने २०७ चेंडूत १३६ धावा केल्या. त्याच्या या झुंझार फलंदाजीमुळे आफ्रिकेला हा शानदार विजय गवसला. मार्कराम याने १४ चौकार मारले. नेहमी आयसीसी स्पर्धेतील उपांत्यफेरी आणि अंतिम सामन्यामध्ये प्रवेश करून पराभवाची चव चाखणार्‍या दक्षिण आफ्रिकेने यावेळी विजयाचा गुलाल उधळला आहे. आफ्रिकेने अंतिम सामन्यात ऑस्ट्रेलियावर थरारक विजय मिळवत २७ वर्षांचा चोकर्स टॅग पुसून टाकला आणि आयसीसी चषकावर दुसर्‍यांदा नाव कोरले.